នីតិវិធីនៃការសុំចូលសញ្ជាតិខ្មែរ English

ការចូល​សញ្ជាតិ​ខ្មែរ តាមរយៈ​សញ្ជាតូបនីយកម្ម​ជនបរទេស​អាច​សុំចូល​សញ្ជាតិ​ខ្មែរ​បានដោយ​សញ្ជាតូបនីយកម្ម​។ នេះ​បើតាម​មាត្រា ៧ នៃ​ច្បាប់​ស្តីពី​សញ្ជាតិ​។ ច្បាប់​ដដែល​ពន្យល់ថា សញ្ជាតូបនីយកម្ម មិនមែនជា​សិទ្ធិ​របស់​អ្នកស្នើសុំ​ឡើយ គឺជា​ការអនុគ្រោះ​របស់​ព្រះរាជាណាចក្រ​កម្ពុជា​តែប៉ុណ្ណោះ ក្នុងការ​សម្រេច​ឲ្យ​ជនបរទេស​ណា​ម្នាក់​ទទួល​សញ្ជាតិ​ខ្មែរ​។ ទោះ​ក្នុង​ប្រការ​ណាក៏ដោយ ពាក្យសុំ​នោះ​អាច​ត្រូវ​បដិសេធចោល​បាន​តាម​អំណាច​ឆន្ទានុសិទ្ធិ​។ នៅក្នុង​មាត្រា ៨ បាន​កំណត់ថា ជនបរទេស​ដែល​អាច​សុំ​សញ្ជាតូបនីយកម្ម​បាន ត្រូវបំពេញ​លក្ខខណ្ឌ​ដូចខាងក្រោម​៖

​១. ត្រូវមាន​លិខិត​បញ្ជាក់ថា មានគំនិត​មារយាទ​និង​សីលធម៌​ល្អ ដែល​ចេញ​ឲ្យ​ដោយ​មេឃុំ ឬ​ចៅសង្កាត់​នៃ​ទីលំនៅ​របស់ខ្លួន​។

២. ត្រូវមាន​លិខិត​ថ្កោលទោស​បញ្ជាក់ថា ពុំដែល​មានទោស​ពីបទ​ព្រហ្មទណ្ឌ​ណាមួយ

៣. ត្រូវមាន​លិខិត​បញ្ជាក់ថា ជន​នោះ​មាន​ទីលំនៅ​ក្នុង​ព្រះរាជាណាចក្រ​កម្ពុជា ហើយ​ស្នាក់​នៅជាប់​ចំនួន ៧ ឆ្នាំ ដោយ​គិតពី​ថ្ងៃ​ដែល​បានទទួល​បណ្ណ​ស្នាក់នៅ ចេញ​ឲ្យ​ក្នុង​ក្របខណ្ឌ​នៃ​ច្បាប់​ស្តីពី​អន្តោប្រវេសន៍​។​

៤.ត្រូវមាន​ទីលំនៅ​ក្នុង​ព្រះរាជាណាចក្រ​កម្ពុជា​នៅពេល​ដាក់ពាក្យ​សុំ​ស​ញ្ជា​តូប​នី​កម្ម​។ 

៥. ត្រូវ​ចេះ​និយាយ​ភាសា​ខ្មែរ ចេះអក្សរ​ខ្មែរ និង​យល់ដឹង​ពី​ប្រវត្តិសាស្ត្រ​ខ្មែរ​ខ្លះ​ ហើយ​បង្ហាញ ភស្តុតាង​ច្បាស់​ថា ខ្លួន​អាច​រស់នៅ​ក្នុងសង្គម​ខ្មែរ​បាន​ដោយ​សុខដុម ព្រមទាំង​ទទួលបាន​នូវ​ទំនៀមទម្លាប់​និង​ប្រពៃណី​ល្អ​របស់​ខ្មែរ

៦. ត្រូវមាន​បញ្ញា និង​កាយសម្បទា​ដែល​មិន​នាំ​ឲ្យ​មាន​គ្រោះថ្នាក់  ឬ​នាំ​ឲ្យ​មាន​បន្ទុក​ដល់​ជាតិ​។​

​សម្គាល់៖  ត្រង់​លក្ខខណ្ឌ​ចំណុច​ទី ៣ នៃ​មាត្រា ៨ ត្រូវបាន​លើកលែង  ចំពោះ​ជនបរទេស មាន​លក្ខណៈសម្បត្តិ​ដូចជា  ជនបរទេស​ណា ដែល​បានទទួល​លិខិតអនុញ្ញាត​ឲ្យ​វិនិយោគ​ពី​ក្រុមប្រឹក្សា​អភិវឌ្ឍន៍​កម្ពុជា ហើយ​ដែល​បាន​អនុវត្ត​គម្រោង​ជាក់ស្តែង​ចំណាយ​ទុនវិនិយោគ​ចាប់ពី ១,២៥០ លាន​រៀល ឡើងទៅ​។ លើសពីនេះ ក៏​លើកលែង​ដែរ ចំពោះ​ជនបរទេស​ណា​ដែល​ពុំមាន​លិខិតអនុញ្ញាត​ពី​ក្រុមប្រឹក្សា​អភិវឌ្ឍន៍​កម្ពុជា តែ​ទទួលបាន​អនុញ្ញាត​ត្រ​ម​ត្រូវ​តាមច្បាប់  ដែល​បាន​ចំណាយ​ទុនវិនិយោគ​ចាប់ពី ១២៥០ លាន​រៀល ឡើងទៅ និង​ចំពោះ​ជនបរទេស​ដែល​បានបង្ហាញ​នូវ​ភស្តុតាង​ថា បានផ្តល់​គុណសម្បត្តិ​ពិសេស ឬ​ថ្វីដៃ​ពិសេស​អ្វីមួយ​ជា​ប្រយោជន៍​ដល់​ព្រះរាជាណាចក្រ​កម្ពុជា​អាចធ្វើ​ពាក្យ​ចូលសញ្ជាតិ​ខ្មែរ ។ ដោយឡែក ចំពោះ​ជនបរទេស​ណា ដែល​បានធ្វើ​អំណោយ​ជា​ប្រាក់​ដល់​ថវិកាជាតិ​ចាប់​ពី១,០០០,០០០,០០០ (មួយពាន់លាន) ​រៀល ឡើងទៅ សម្រាប់​ជា​ប្រ​ផលប្រយោជន៍​ដល់​ការស្តារ និង​កសាង​សេដ្ឋកិច្ច​នៃ​កម្ពុជា  ជន​នោះ​ក៏​អាចធ្វើ​ពាក្យសុំ​សញ្ជាតិ​ខ្មែរ​បាន ក្នុងករណី​ដែល​ជន​នោះបាន​ពេញ​លក្ខខណ្ឌ ដូចដែល​មានចែង​នៅក្នុង​ចំណុច​ទី ១, ទី ២, ទី ៥, និងទី ៦ នៃ​មាត្រា ៨ ។

ទំនាក់ទំនងលោក មួត សុភ័ត្រា ដើម្បីប្រឹក្សាយោបល់បន្ថែម។

📞 Phone / Telegram  /  Whatsapp: +855(0) 92 76 50 76

📧 Email: attra.legaman@gmail.com